Hasinywe amasezerano rusange y’umurimo hagati ya Sendika y’abakozi bakora imirimo y’isuku n’isukura (SYNTHA) n’ibigo bikora isuku COPED na CGS Ltd ibi kandi byanahuriranye n’umunsi mpuzamahanga w’umurimo wizihizwa buri taliki ya 01 Gicurasi buri mwaka.
Aya masezerano y’umurimo yasinywe agamije guteza imbere umukozi ukora mu mirimo y’isuku n’isukura hazamurwa imibereho myiza ye ndetse no kubahugura kugirango imirimo yabo irusheho kugenda neza,azanafasha kandi abakora muri iyo mirimo gukemura ibibazo bahura nabyo bigakemukira ku rwego rw’ikigo bitabaye ngombwa ko bigera kure.
Abayobozi bashyize umukono kuri aya masezerano bose biyemeje kuyubahiriza kuko akubiyemo ibizabageza ku musaruro ushimishije yaba ku ruhande rw’abakoresha ndetse n’uruhande rw’abakozi ruhagarariwe na Sendika Syntha.
Bwana Migambi Ernest ni Umuyobozi wa Sendika y’abakozi bakora imirimo y’isuku n’isukura (SYNTHA) yavuze ko aya masezerano y’umurimo ariyo ya mbere asinywe muri uru rwego rw’isuku n’isukura hagati y’abakozi n’abakoresha yemeza ko aje ari ingirakamaro ku mpande zose kuko azabafasha gukemura ibibazo bitari bike bahuraga nabyo.
Ati »Aya masezerano y’umurimo dusinye uyu munsi niyo masezerano y’umurimo ya mbere asinywe muri uru rwego rw’isuku n’isukura,turizera ko nidushyira hamwe mu kuyubahiriza azatuzanira inyungu nyinshi zirimo gutera imbere kw’ibigo bikora isuku n’isukura ndetse n’abakozi babikorera,azadufasha kandi no gukemura ibibazo aba bakozi bahuraga nabyo mu kazi kabo ka buri minsi. »
Ku ruhande rwe Umuyobozi mukuru wa COPED (CBC) Bwana BUREGEYA Paulin yavuze ko bishimiye gusinya aya masezerano kuko babibona inyungu nyinshi zirimo amagurwa azahabwa abakozi babo batajyaga babona umwanya wo kuyabaha ariko Sendika Syntha ikazabibafashamo bityo bikazamura imyumvire y’abakozi ndetse no kunoza umurimo,indi nyumvu abona muri aya masezerano ni ugukemura ibibazo hagati yabo mu gihe byabayeho bitabaye ngombwa ko bigera kure kuko Sendika Syntha nabyo izabibafashamo,avuga kandi ko ibi byose nibigerwaho n’inyungu mu mafaranga uzaboneka bityo bagakomeza gutera imbere.
CGS Ltd nayo yashyize umukono kuri aya masezerano,Umuyobozi mukuru wayo Bwana TUYISHIME David nawe yashimye Sendika Syntha ku mikoranire myiza yaberetse cyane cyane mu guteza imbere abakozi bakora imirimo y’isuku n’isukura bityo bakarushaho gutanga umusaruro cyane ko mu mahugurwa abakozi bazahabwa harimo najyanye n’imyitwarire myiza ndetse n’amategeko agenga umurimo ibi bikiyongeraho no kwigisha abakozi kwizigamira.
Yakomeje avuga ko iyi mikoranire izanafasha abakozi gukunda umurimo dore ko hari bamwe mu bakozi bumva ko ikibahuza n’abakoresha ari amafaranga gusa kandi hari byinshi umukozi n’umukoresha baba bahuriyeho ndetse bubakiraho kugirango akazi kagende neza.
Uwari uhagarariye Impuzamasendika Cotraf-Rwanda Bwana Gakumba Adrien yavuze ko ari ibyishimo kuri bo kuko Syntha ari imwe muri Sendika zigize Impuzamasendika Cotraf-Rwanda ibashije gusinya amasezerano rusange y’umurimo ikagera ikirenge mu zindi zabanje,ashimira abashyize umukono kuri ayo masezerano anagaragaza ko urwego rw’umurimo y’isuku n’isukura rumaze gutera imbere kuko bakora kinyamwuga.
Yagize ati »Turashimira abashyize umukono kuri aya masezerano kuko bigaragaza intambwe ishimishije mumaze gutera yo gukora kinyamwuga,icyo dukomeza kubasaba ni ugushyira mu bikorwa ibiyakubiyemo ndetse no kurushaho kwimakaza umuco w’ibiganiro kugirango n’ibibazo byagaragara mubashe kubyikemurira kandi ibi bizabafasha kurushaho gutera imbere mu bigo. »
Yakomeje avuga ko Cotraf-Rwanda izakomeza nayo kubaba hafi aho bayikenera hose haba kubagira inama n’ibindi.
SYNTHA bivuze Syndicat National des Travailleurs-euses d’Hygiène et Assainissement mu magambo arambuye y’igifaransa
